XURMO
Cirka oo xayaab iyo
Lagu xeeray jeegaan
Xiddiguhu iftiinsheen
Dayaxuna xareed yahay
Xiddigtii ka timideey
Dhulka xuddun ka dhigatoo
Xayndaabka idilkiiba
quruxbaad ku xaradhee
Waxad tahay xulkii dumar
Xiddigtii shuhuuroo
Dhulka xero ka dhigatoo
Xagga sare ka timideey
Qof xariirabaad tahay
Xuuralcayn ugbaadiyo
Waxad tahay xishood badan
Xijaab diintu sheegtuun
Weligeedba xidhatiyo
Xubno dhawrsanbaad tahay
Dhar xaddaarad keentayna
Weligaaba maad xidhan
marka cilmi loo xagdayo
Xadiisyada rasuulkiyo
Xafidaad qur'aanbaad
Xiska huunno ku haysaa
Xamdigiyo takbiirtana
Xilliqudha ta aan dhigin
E xambaarsanbaad tahay
Midda xaramka aaddee
Allaheeda xaakimi
ifka uu xurmeeyee
Aakhiro xushmeeyee
Xisaabtana midigtiyo
Xagga nebigu jooguun
U xaq mudataybaad noqon
Xilkas deeqsan baad tahay
Hadal laab xaleenoo
Aan xanaf lahaynoo
Xalsillooni beeruu
Xaakimkay ku siiyoo
Maankaa u xiisoo
Xilli qudha hadduu tabo
Wuu xagal wareegaa
Bilis xaawa oo idil
Adaan kaa xushe garo
xannaanaynta caashaqa
kal-jeclaysi xuladabaa
xubnahaygiyo badankiyo
xabbadkayga biyodhigay
ku talaal xiskaagoo
haka tegin xalaalyahay
xikmad aayatiinliyo
xarafyada jacalkaad
ku xashaa kashaydoo
laab xaadhnidaadaa
xubbi igu abuurtee
naftu xiiso jamashada
aday kuu xidhxidhantahay
xididdada dareenkiyo
xawilaaya caashaqu
aday kuu xaglinayaan
jacayl kuu xaddidayaan
samo kuu xarrigayaan
xiqdi waad ka madhantahay
xasad waad ka ladantahay
xanta waad ka maqantahay
dembi waad ka xidhantahay
xume waad ka dedantahay
xogaha qaar dahsooni
xaynkaaga hadday galaan
xaqiiq adaana faafin
sharafta adan xayuubin
milgaha caashaq xuurin
xaqiiq adaan asqaynin
ilayn xeelad garashada
xog-ogaal kasmaaliyo
xeer-beegtibaad tahay
xor inaad ahaatood
xubbi ila wadaagtaan
ku xisaabtamaayoo
nafta gabadh loo xulaay
xilo loo dhaxaad tahay
xigto soorta lagu sabo
xirfadbaad u leedahay
‘HAL-ABUUR Xamse Maxamed Nuur’
Comments
Post a Comment